Четири лица се здобиле со повреди по меѓусебната тепачка што вчера околу 17 часот се случила на крстосницата од булеварот „Маршал Тито“ и улицата „Јане Сандански“ во центарот на Тетово, информираше денеска портпаролот на СВР Тетово Марјан Јосифовски.
Според неговите податоци од едната страна учествувале браќата А.Ш.(30) и А.Ш.(29) од Тетово и Е.С.(23) и М.И.(31) од тетовското село Џепчиште.
Четворицата меѓусебе си задале повеќе удари со тупаници и клоци, а се здобиле и исеченици бидејќи при полицискиот увид во близина на местото од тепачката бил пронајден и нож што бил подигнат за вештачење за да се утврди чиј е и кој и како го употребил во тепачката.
– Четворицата биле приведени од тетовската полиција и било разговарано со нив, а по расчистувањето на сите поединости ќе следуваат и соодветни поднесоци – рече Јосифовски.
Тој информираше дека вчерашната тепачка следувала откако само еден ден претходно, во четвртокот, повозрасниот од браќата А.Ш.(30) пријавил дека М.И.(31) заедно со повеќе други лица кои биле во неколку возила го пресретнале и физички го нападнале кај бензинската пумпа во тетовската населба Дреновец.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
