Пратеник на СИРИЗА ја критикува грчката влада: Граѓаните не гласаа за вас за да менувате зборови, туку да ја смените ситуацијата

Пратеникот од редовите на СИРИЗА Манолис Глезос ја критикуваше владата во Атина поради потпишувањето на договорот меѓу Грција и нејзиниот европски партнер со оцена дека промената на зборовите не значи промена на ситуацијата.

„Преименувањето на „тројката“ во институции, меморандуми во договор и на заемодавците во партнери, како што преименувате риба во месо, не значи промена на претходната ситуација“, напиша Глезос во текст објавен на веб-страницата Движење на активни граѓани, пренесува грчката агенција АНА.

Тоа не им менува ништо на гласачите што на 25 јануари гласаа за ветувањето на СИРИЗА: крај на мерките за штедење, меморандумите и тројката, истакнува Глезос.

– Помина месец и ветувањата сѐ уште не се претворени во акција. Тоа е срамота. Вистинска срамота – изјавил Глезос извинувајќи им се на грчките граѓани што учествувал во таа илузија и ги повика да реагираат пред да биде предоцна.

– За почеток, не смее да има компромиси меѓу угнетените и угнетувачите, како и меѓу робовите и освојувачите, единствено решение е слобода – додава Глезос.

Коментирајќи го текстот на грчкиот пратеник, извори од владата велат дека е можно Манолис Глезос да не е добро информиран за тешките преговори, кои и понатаму траат, а кои се насочени кон обновата на достоинството на грчкиот народ.

93-годишниот Глезос, грчки политичар и писател, учесник во Втората светска војна, беше кандидат на СИРИЗА на изборите за Европскиот парламент на 25 мај 2014 година, а беше избран со повеќе од 430.000 гласови, повеќе од кој било друг кандидат во Грција. Тој, исто така, е најстар пратеник во Европскиот парламент.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.