Дали на гледачите им е важно што фактите изнесени во филм се точни, а што е уште поважно во контекст на сезоната на награди, дали вистината за филмот може да им наштети на шансите за некое остварување да добие „Оскар“? Или на членовите на Академијата за филм, која доделува „Оскар“, им е важна само приказната?
Неколку филмови кои в недела ќе се најдат во трката за „Оскар“ се темелени на вистински настани и за нив тоа се прашања од суштинско значење, пренесува „Танјуг“.
Филмот „Селма“ за Мартин Лутер Кинг на режисерката Ава Ду Вернеј го критикуваат поради погрешно претставување на претседателот на САД, Линдон Џонсон, како непријател на овој борец за граѓански права на Црнците.
Некои критичари го обвинуваат Клинт Иствуд дека со филмот „Снајперист“ за елитниот снајперист на американската војска Крис Кајл, кој убил 160 луѓе во Ирак, го глорифицира масовното убиство.
Претходните години, филмот „Тајната операција 00.30“ (Zero Dark Thirty), кој исто така беше во трката за „Оскар“ во 2013 година, се најде на удар на критики поради тоа што агентот на ЦИА, која практикувала мачење на затворениците, бил претставен како херој, но се нашле и тие кои тврделе дека филмот помогнал во реизбор на претседателот Барак Обама.
Таа година „Оскарот“ за најдобар филм го доби остварувањето „Арго“, приказна за смела операција на ЦИА чијашто цел била да се извлечат шест американски дипломати заробени во Иран во 1979 година.
Филмот во режија на Бен Афлек бил критикуван поради преслободната интерпретација на историските факти и поради тоа што не оддал признание на Канада, која учествувала во спасувачката операција.
Претходните години, филмовите на Оливер Стоун „Џ. Ф. К.“ од 1991 година и „Прекрасен ум“ на Рон Хауард во 2001 година, исто така, предизвикаа контроверзии.
– На еден филм контроверзии не му помагаат – вели Том Нунан, кој го режираше филмот „Судир“ (добитник на Оскар) и кој предава на Универзитетот „Калифорнија“.
– Но, не е чудно што тие контроверзии се појавуваат бидејќи тие можат да помогнат во елиминација на ривалите во клучните, финални фази на кампањата за „Оскар“.
– Конкуренцијата често е таа што ви го извлекува килимот под нозете – рече тој.
Том О`Нил, кој го води аналитичкиот веб-сајт „Голддерби“ (goldderby.com), смета дека членовите на Академијата, сепак, се потолерантни кон слободата која сценаристите ја имаат и фактот дека некоја улога може да биде сатанизирана.
– Не сметам дека контроверзиите околу „Снајперист“ ќе му наштет на Бредли Купер, актер во главна улога номиниран за „Оскар“, можеби дури и ќе му помогнат. Гласачите можеби ќе сакаат да му помогнат на американскиот херој ако почуствуваат дека е нападнат.
Филмот „Теорија на сѐ“ за британскиот астрофизичар Стивен Хокинг, исто така, е критикуван за преслободен пристап, овојпат во врска со неговата животна хронологија во врска со првата сопруга Џејн.
– Тоа е љубовна приказна и луѓето навиваат за оваа приказна, така што критиките нема да им наштетат на шансите за филмот – вели О’Нил.
Меѓутоа, тој смета дека контроверзиите околу Линдон Џонсон во „Селма“ може да му наштетат на филмот.
– Некои факти можат да се заобиколат, но мора да знаете кој е херојот, а кој е злосторникот. Членовите на Академијата не сакаат кога историска личност или улога драстично е изменета – рече тој.
Но, Нуман смета дека некое поигрување со фактите, сепак, е неизбежно.
– Филмот мора да има некои слободи, инаку нема емотивно да ги придобие гледачите. Гледањето филм треба да биде забавно и на гледачите да им пружи бегство од реалноста.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
