Во Московската област се уапсени петмина членови на група, која извршила над 25 убиства и други тешки криминални дела, соопшти рускиот Истражен комитет.
Криминалната група, формирана и раководена од Аслан Агиев, роден во Грузија, од 2007 година дејствувала во Москва и Северна Осетија. Групата има над 30 припадници.
Во заедничка операција на Федералната служба за безбедност и Министерството за внатрешни работи на Северна Осетија синоќа се уапсени членови на групата за кои се издадени и национални и меѓународни потерници, Инал Засеев, Роберт Багаев, Руслан Јортов, Ерик Таутиев и Дмитриј Кодоев.
Во 2008 година членови на групата, меѓу другите, ги убија градоначалникот на Владикавказ, Виталиј Караев, шефот на полицискиот оддел за борба против организираниот криминал во Северна Осетија Марк Мецаев, северносетискиот вицепремиер Казбег Пагиев и неговиот возач Владимир Гасиев.
Дел од членовите од групата веќе се осудени, 13 се под истрага, против двајца се водат процеси, а за десет, меѓу кои и водачот се издадени меѓународни потерници.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
