Актерот Драган Спасов-Дац од Драмски театар – Скопје е добитник на наградата за животно дело „Петре Прличко“ за 2013 година, одлучи жирито во состав: Јордан Витанов, Зоран Љутков и Васил Зафирчев.
Наградата е востановена во 2006 година од Општина Велес, Народниот театар „Јордан Хаџи Константинов-Џинот“-Велес и Здружението на театарски уметници „Џинот“ и се состои од плакета со ликот на Петре Прличко и паричен износ од 30.000 денари.
Во образложението на жирито е наведено дека Спасов е актер од помладата генерација кој зад себе има впечатливи актерски остварувања, а со својата свежа и продуховена игра позитивно се наметнал кај публиката и кај театарската критика.
– Моќта за силни уметнички трансформации ја прави неговата игра секогаш полна со нијанси и затоа Драган Спасов-Дац на сцената зрачи со своите физички и психолошки варијации, а притоа суверено ја претставува современата и модерна актерска игра – истакна Васил Зафирчев на прес-конференција.
Драган Спасов-Дац, кој е избран во конкуренција со уште двајца актери, има голем број значајни улоги во театарски претстави, филмски и телевизиски проекти, како „Грев или шприцер“, „Амадеус“, „Ало будење“, „Дон Жуан“, „Платонов“, „Свадбата на Фигаро“…
Од оправдани причини Дац не присуствуваше на прес-конференцијата, но најавил дека ќе дојде на врачувањето на наградата – на 9 ноември, во рамки на програмата за одбележување на Денот на општина Велес. Во чест на лауреатот, Велешкиот театар на својата матична сцена ќе ја одигра претставата „Ноќите во бел сатен“.
Во изминатите седум години наградата „Петре Прличко“ ја добија актерите: Благоја Спирковски-Џумерко, Емил Рубен, Петар Мирчевски, Благоја Чоревски, Мето Јовановски, Борис Чоревски и Петар Темелковски.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
