Во денешната програма на Светското првенство (СП) во атлетика, кое се одржува во Москва, се завршени уште шест финални дисциплини.
Американецот Дејвид Оливер, кој беше фаворит во трката на 110 метри со пречки, ја оправда улогата и го освои првото место со време 13.00 секунди пред сонародникот Рајан Вилсон, кој заостана 13 стотинки и домашниот наптpеварувач, Русинот Сергеј Шубенков. Рускиот атлетичар заостана 24 стотинки зад Оливер и не дозволи тројна победа на Американците во оваа дисциплина, благодарејќи на грешката на Џејсон Ричарсон во последните десетина метри пред целта.
Во натправарот на најбрзата дисциплина – 100 метри во женска конкуренција победи Шели Ен Фрејзер Прајс од Јамајка, која без проблеми ја заврши патеката за 10.71 секунди, пред Мјуриел Ахуре од Брегот на Слоновата Коска и Кармелита Џетер, која во фотофиниш се избори за бронзен медал.
Сепак, најинтересна беше трката на 400 метри за жени, која во фотофиниш и со идентичен резултат 49.41 секудни ја истрчаа Британката Кристина Охурогу и Амантли Моншо од Боцвана. Сепак, судиите по прегледувањето на снимките и замрзнување на сликата победата ѝ ја доделија на Охурогу, која по шест години повторно се закити со најсјајното признание. На третото место, за голема радост на домаќините, се пласираше Русинката Антонина Кривошапка со заостанување од 37 стотинки.
Доминацијата во фрлање ѓуле во женска конкуренција ја потврди Валери Адамс од Нов Зеланд, која докажа дека е неприкосновена во оваа дисциплина и се закити со четврто злато во низа од светските првенства. Адама е и двократна олимписка шампионка. Таа, ѓулето го фрли најдалеку во третата серија – 20.88 метри.
Павел Фајдек од Полска е новиот светски шампион во фрлање кладиво. Тој првиот златен медал за својата земја од светските шампионати ѝ го донесе во првата серија со фрлени 81.97 метри.
Германците можат да слават со победата на Рафаел Хелздепе, кој победи во дисциплината скок со стап со прескокнати 5.89 метри. На второто место се пласираше Французинот Рене Лавилени, кој, исто така, ја прескокна оваа височина, но поради послабата серија мораше да се задоволи со сребрениот медал. На третото место се пласираше уште еден Германец – Бјорн Ото, кој прескокна 5 метри и 82 самтиметри.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
